الفتة المصري الي بالخل و الثوم الشهية :-)
الطريقة الكلاسيكية من غير فزلكة ... أسهل ما يكون :
أول حاجة اللحمة :
تسلقيها عادي لحد لما تستوي و بعدين ، تشيلها من الشوربة و تصفيها
و بعدين بتحمريها في سمن بلدي أو سمن نوع نضيف .
تاني حاجة صلصة الفتة :
في طاسة حتشوحي ثوم مفروم ناعم فريش في معلقة سمنة كبيرة ،
لحد لما ياخد لوني ذهبي خفيف ، و بعدين تطشي شوية خل أبيض،
و بعدين تحطي علي طوول عصيرطماطم فريش مضروبة في الخلاط،
و بعدين تحط التوابل ( ملح و فلفل و شوية كمون و كسبرة ناشفة ).
و بعدين تسبيها تتسبك لحد لما تتشرب من بعضيها و تبقي سميكة شوية.
ثالث حاجة الرز الأبيض المفلفل :
في حلة حتشوحي معلقة سمن و عليهم شوية زيت مع رز أبيض مصري،
مغسول و متصفي ، و بعدين تحطي توابل ملح و فلفل أسمر ، و تفضلي
تقلبي فيهم لمدة ٥ دقائق و بعدين تحطي شوربة اللحم ( مرقة) أو ماء مغلي
نفس كمية الرز، يعني لو عاملة ٢ كوب رز مصري = محتاج ٢ كوب شوربة اللحم
( مرقة) مغلي.
و بعدين تغطية و تسبية يغلي ، و أول لما يغلي الرز و يتشرب الشوربة توطي علي طووول النار لحد لما يستوي و بعدين تطفي النار علي طوول .
رابع حاجة الفتة نفسها وهي العيش أو الخبز وعلية طشة الفتة :
عبارة عن عيش أو خبز متحمص في الفرن أو مقلي في الزيت .
و بعدين تحطي علية كبشة أو كوب صغير شوربة لحم ( المرقة) ،
خامسا : الطشة الفتة بالخل بالثوم :
في طاسة تشوحي ثوم فريش كتييير مفروم ناعم لح لما يبقي ذهبي شوية ،
و بعدين تطشي علية خل أبيض كتير و شوية ملح .
و بعدين كتري الطشة شوية علشان ها نحط منها علي العيش
و شوية للتزين علي وش طبق الفتة ساعة التقديم .
و بي كدة خلصتي أروع و أبسط و ألذ فتة بالخل و الثوم ما حصلت ،
و فاضل طريقة التقديم كالآتي :
في قاع طبق التقديم نحط العيش أو الخبز المحمص و علية شوية شوربة
و شوية طشة الفتة بالخل و الثوم.
و بعدين عليهم طبقة رز أبيض مسلوق ،
و بعدين نزين وجه الرز بي صلصلة الفتة بشكل جميل ،
و بعدين نرص في النهاية قطع اللحم المتحمرة اللذيذة .