المقاديــــــــــــــر
1 فرخة كبيرة كاملة غير منزوعة الجلد
1 بصلة كبيرة
1 طماطم
1 كوب زبادى
2 معلقة خل
1 معلقة صغيرة جنزبيل بودرة
1 معلقة كبيرة زعتر ناشف
معلقة ملح
معلقة فلفل
معلقة صلصة بقليل من الملح
الطريقــــــــــــه
- اغسلى الفرخة من جوه وبرة بالمياة الجارية والملح والخل كويس وبعدين اعملى فاصل بين الفرخة والجلد علشان تحطى التتبيلة وصفيها من المياة الزائدة وتبقى محتفظة بجلدها.
- اعملى فتحات بالسكينة (شقوق) وتكون الشقوق تحت الجلد بمعنى انها تكون فى اللحم ومش فى الجلد علشان طعمها يكون حلو.
- اضربى البصلة مع الطماطم مع كوب الزبادى فى الكبة وحطيهم على الفرخة وتبلى بيهم الفرخة كويس من تحت الجلد وفى الشقوق يعنى من جوه وبرة على اد ما تقدرى.
- سيبى الفرخة فى التتبيلة وغطيها كويس وحطيها فى الثلاجة اطول فترة ممكنة ويفضل تبات يوم.
- بعد كدة صفى الفرخة وحطى عليها التوابل الملح والفلفل والجنزبيل والزعتر وادعكيها كويس جوه وبرة وسيبيها نصف ساعة اخرى وعلشان تاخد لون من برة جميل ادهنيها بمعلقة صلصة وحبة ملح صغيرين من كل الجوانب.
- هاتى زجاجة من الزجاج حجم مناسب للفرخة وامليها مياة ودخلى فيها الفرخة وحطيها فى صينية مليانة مياة لغاية نصفها ودخليها الفرن 20 دقيقة على درجة حرارة عالية وبعدين كملى سواها على درجة حرارة 180 لمدة ساعة كاملة او لغاية لما لونها يبقى دهبى او بنى فاتح.
- خرجى الفرخة من الفرن وحطيها فى طبق كبير وتكونى مسخنه فحمة وحطيها على ورقة صغيرة من الفويل وعليها شوية زيت وسيبيها مع الفرخة وغطيها بورق الفويل كويس علشان تاخذ طعم ورائحة الشوى على الفحم والهنا والشفا
ملحوظــــــــــه متخفيش الزجاجة مش هتكسر او تفرقع فى الفران علشان فية مياة وبس كدة ودة اختراع المصريين ولسة يا ما هنشوف