دي شاورما سوري وبطاطس وتوميه
العيش الاول : كوبايتين دقيق ونص كوباية لبن ونص كوبايه مايه ورشة ملح ومعلقه نشا صغيره لو عايزينه مقرمش ،هنعجن كله سوا لحد ما يبقي القوام خفيف كدا زي البان كيك وف طاسه سخنه ممسوحه زيت هننزل بكبشه م العجين ونفردها كدا ف الطاسه وشويه لما يستوي نقلبها ع الجنب التاني (العيش ده قمر وبينفع يتحشي اااي حاجه)
الشاورما : نص كيلو بانيه متقطع هنتبله بملح وفلفل اسود وبابريكا وجنزبيل باودر ومكعبين مرقه وفصين حبهان مطحون او عادي و معلقتين خل ولمون وربع كوبايه زيت وربع كوبايه لبن وزعتر وبصل باودر وتوم باودر و نسيبها ف التتبيلة أقل حاجه 3 ساعات ولو اكتر يبقي احلي
وعلي جريل أو طاسه ممسوحه زيت هنشوحها بتتبيلتها لحد ما تستوي وممكن لو عايزة تحطيها تحت الشوايه شويه بعد ما تستوي دي اختياري
التوميه بقي احلي طريقه جربتها ليهاا : معلقتين نشا علي كوباية مايه ندوبهم ع البارد وبعدين ع النار نفضل نقلب لحد ماتتقل نطفي ونسيبها تبرد بعد كدا ف الكبه أو الخلاط نحط 3 فصوص توم كبار مفرومين وعليهم 3 معالق لبن ومعلقتين مايونيز أو بدالها زبادي ونضربهم كويس الاول بعد كدا نضيف عليهم النشا ونحط نص معلقه ملح صغيره وربع كوباية زيت ومعلقه خل ولمونه ونضربهم كويس لحد مالقوام يتقل بس
البطاطس بنقليها طبعا كلنا عارفين ده 😂♥️ بس هقولكو ع تركايه تخليها زي البطاطس الفارم نقطع البطاطس تخينه شويه وننقعها ساعتين قبل مانقليها ف شويه خل وملح مع المايه وبعدين نقليها متغسلوهاش ولا حاجه تاني بس كدااا